ஏற்கனவே...

ரொம்ப  நாட்கள் ஆயிற்று என் கவிதைகளைப் பதிவேற்றி.
எந்தக் கவிதையை இதற்கு முன் இந்தப் பக்கத்தில் வைத்திருக்கிறேன்
என்ற தீர்மானமும் இல்லை.

ஏற்கனவே  பார்த்திருக்கிறீர்கள் என்றால், இது மீள் பார்வை.
ஏற்கனவே வாசித்து விட்டிருக்கிறீர்கள்  என்றால் இது மீள் வாசிப்பு.

*

நதிக் கல்.

இதற்கு  மேல்  உருள முடியாது
கல் நதியை விட்டுக் கரையேறிற்று .
இதற்கு மேல் வழ வழப்பாக்க முடியாது
கல்லை ஒதுக்கிவிட்டு
நதி ஏகிற்று.


விடுவித்தல்.

சிலுவை ஒரு அழகான வடிவம்.
குறுக்கும் மறுக்குமான
கிராமத்துத் தெருக்களாக.
ஆணிகளின் உறுதிக்கும்
குறைவில்லை.
அறையப்பட்டவரை அகற்றினால்
விடுவித்துவிடலாம்
சிலுவையை..


*
கல்யாண்ஜி.